ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა #232

ხვიჩას მაგიდაზე აქვს ქვების ერთი გროვა, რომელიც შეიცავს 1001 ქვას. ხვიჩას ყოველ ჯერზე შეუძლია შეასრულოს შემდეგი ოპერაცია: აირჩიოს გროვა, რომელიც შეიცავს ერთ ქვაზე მეტს, გადააგდოს ერთი ქვა გროვიდან და გროვა გაყოს ორ ნაწილად (არაა აუცილებელი თანაბარ ნაწილად გაყოფა). შეიძლება თუ არა, რომ ხვიჩამ გარკვეული რაოდენობის ოპერაციის შესრულების შემდეგ მიიღოს სიტუაცია, როდესაც მაგიდაზე არსებული ქვების ყველა გროვა შეიცავს ზუსტად სამ ქვას? 

ამოცანის ამოხსნა  

s-ით აღვნიშნოთ მაგიდაზე არსებული გროვების რაოდენობის და ქვების რაოდენობის ჯამი. შევნიშნოთ, რომ ამოცანის პირობით განსაზღვრული ყოველი ახალი ოპერაციის შემდეგ, s უცვლელია (მაგიდაზე არსებული გროვების რაოდენობა ყოველ ახალ ოპერაციაზე ერთით იზრდება, ხოლო მაგიდაზე არსებული ქვების ოდენობა ერთით მცირდება). s-ის საწყისი მნიშვნელობა 1002 ის ტოლია. დავუშვათ, გარკვეული რაოდენობის შემდეგ მივიღეთ k რაოდენობის გროვა, რომელთაგან, თითოეული შეიცავს ზუსტად სამ ქვას. ამ შემთხვევაში, ქვების რაოდენობა იქნება 3k. ქვების და გროვების ოდენობების ჯარმი s=k+3k=4k და ეს ვერ იქნება 1002-ის ტოლი, რადგან 4k იყოფა 4-ზე უნაშთოდ, ხოლო 1002 - არა. შესაბამისად, ხვიჩა ვერასოდეს მიიღებს სიტუაციას, როდესაც მაგიდაზე არსებული ყველა გროვა შეიცავს ზუსტად სამ ქვას.

 

ამჯერად ჟურნალის მკითხველებიდან სწორი პასუხი ვერავის გვაცნობა. 

მორიგი ამოცანა #233  

დაფაზე ჩამოწერილია ყველა ნატურალური რიცხვი 1-დან 2019-ის ჩათვლით. ხვიჩა და გოჩა თამაშობენ შემდეგ თამაშს: ისინი ყოველ სვლაზე, მორიგეობით შლიან დაფაზე დაწერილ რიცხვებს, მანამ, სანამ დაფაზე არ დარჩება მხოლოდ ორი რიცხვი. პირველ სვლას აკეთებს ხვიჩა. იმარჯვებს ხვიჩა, თუ დაფაზე დარჩენილი ორი რიცხვის უდიდესი საერთო გამყოფი 1-ის ტოლია. სხვა შემთხვევაში, გამარჯვებულია გოჩა. ვინ გაიმარჯვებს სწორი თამაშის შემთხვევაში? პასუხი დაასაბუთეთ. 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი "ზაზი მეტროში"; 

2) ჯ. ლონდონის მოთხრობების კრებული "როცა ღმერთები იცინიან"; 

3) ო. ჰენრის ნოველების კრებული "ზაფხულის შუადღის სიზმარი"; 

4) რეიმონ კენოს რომანი "ქალი არ უნდა გაანებივრო". 

გამარჯვებულის ვინაობა გამოქვეყნდება! დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. გისურვებთ წარმატებებს!