ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა #234

დაფაზე ჩამოწერილია ნატურალური რიცხვები 1-დან 2020-ის ჩათვლით. ხვიჩა და გოჩა თამაშობენ შემდეგ თამაშს: ისინი ყოველ სვლაზე, მორიგეობით შლიან დაფაზე დაწერილ რიცხვებს, მანამ, სანამ დაფაზე არ დარჩება მხოლოდ ორი რიცხვი. პირველ სვლას აკეთებს ხვიჩა. იმარჯვებს ხვიჩა, თუ დაფაზე დარჩენილი ორი რიცხვის უდიდესი საერთო გამყოფი 1-ის ტოლია. სხვა შემთხვევაში, გამარჯვებულია გოჩა. ვინ გაიმარჯვებს სწორი თამაშის შემთხვევაში? პასუხი დაასაბუთეთ. 

ამოცანის ამოხსნა

შევნიშნოთ, რომ თუ დაფაზე დარჩა ორი ლუწი რიცხვი, თამაშს იგებს გოჩა (მათი უდიდესი საერთო გამყოფი აუცილებლად 1-ზე მეტი იქნება). თავიდან დაფაზე თანაბარი ოდენობის ლუწი და კენტი რიცხვია. შესაბამისად, ხვიჩა იძულებულია წაშალოს მხოლოდ ლუწი რიცხვები. გოჩამ უნდა ითამაშოს შემდეგი სტრატეგიით: მან უნდა წაშალოს კენტი რიცხვები, გარდა მაგალითად 3 და 9-ის. თუკი ბოლო სვლამდე რომელიმე სვლის დროს ხვიჩა წაშლის 3-ს ან 9-ს, მაშინ შესაბამისად, გოჩა წაშლის მათგან დარჩენილს. ასეთ შემთხვევაში, დაფაზე აუცილებლად დარჩება მინიმუმ ორი ლუწი რიცხვი და გოჩა მოიგებს. თუ ბოლო სვლამდე არცერთ სვლაზე ხვიჩა არ წაშლის არც 3-ს და არც 9-ს, ბოლო სვლის წინ დაფაზე იქნება 4 რიცხვი: 3, 9 და რომელიმე ორი ლუწი რიცხვი. თუ ბოლოს სვლის დროს ხვიჩა წაშლის 3-ს, გოჩა წაშლის 9-ს და გოჩა მოიგებს. თუ ხვიჩა წაშლის 9-ს, გოჩა წაშლის 3-ს და ისევ გოჩა მოიგებს. თუ ხვიჩა წაშლის რომელიმე ლუწ რიცხვს დარჩენილებიდან, მაშინ გოჩა წაშლის მეორე ლუწ რიცხვს და დაფაზე დარჩება 3 და 9, რომელთა უდიდესი საერთო გამყოფი არის 3, რაც 1-ზე მეტია. ცხადია, ამ შემთხვევაში გაიმარჯვებს გოჩა. მაშასადამე, სწორი თამაშის შემთხვევაში, გამარჯვებული არის გოჩა. 

ამჯერად ჟურნალის მკითხველებიდან სწორი პასუხი ვერავის გვაცნობა. 

მორიგი ამოცანა #235  

გვაქვს ცოცხალი ორგანიზმის ქსოვილი, რომელსაც აქვს 10X10 ფორმა და რომელიც შედგება 1X1 ფორმის უჯრედებისგან. ცნობილია, რომ მთელი ქსოვილის რომელიღაც 9 უჯრედი დაინფიცირებულია. დროის ერთ ერთეულში, უჯრედი, რომელსაც ჰყავს მინიმუმ ორი დაინფიცირებული მეზობელი (მეზობლებად ითვლებიან საერთო გვერდის მქონე უჯრედები), ინფიცირდება. გავრცელდება თუ არა ინფექცია მთელს ქსოვილში? პასუხი დაასაბუთეთ. 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი "ზაზი მეტროში"; 

2) ჯ. ლონდონის მოთხრობების კრებული "როცა ღმერთები იცინიან"; 

3) ო. ჰენრის ნოველების კრებული "ზაფხულის შუადღის სიზმარი"; 

4) რეიმონ კენოს რომანი "ქალი არ უნდა გაანებივრო". 

გამარჯვებულის ვინაობა გამოქვეყნდება! 

დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. 

გისურვებთ წარმატებებს!