ამ რუბრიკით ქვეყნდება საინტერესო ამოცანები იმ მკითხველებისათვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა №242

რიცხვი 1210 "ავტობიოგრაფიული" რიცხვია: მისი პირველი ციფრი გვიჩვენებს 0-ების რაოდენობას რიცხვში, მეორე ციფრი – 1-იანების რაოდენობას, მესამე ციფრი - ორიანების რაოდენობას, ხოლო მეოთხე ციფრი - 3-იანების რაოდენობას. იპოვეთ მომდევნო "ავტობიოგრაფიული" ნატურალური რიცხვი. 

ამოცანის ამოხსნა 

თავდაპირველად განვიხილოთ რიცხვები, 1*** სახის. მეორე ადგილზე მყოფი ციფრი აღნიშნავს 1-იანების რაოდენობას, შესაბამისად, საძიებელ ჩანაწერში 1-იანის შემდეგ (მეორე ადგილზე) ვერ იქნება 0 ან 1. რადგან საძიებელი რიცხვი ოთხნიშნაა, მის ჩანაწერში ვერცერთ ადგილას 4-იანი ან მეტი ციფრი ვერ იქნება. თუ 1-ის შემდეგი ციფრია 3, ანუ გვაქვს 13**, ვერც ასეთი სახის რიცხვი ვერ იქნება ავტობიოგრაფიული (3 ცალ 1-ს უნდა შეიცავდეს და 1 ცალ 0-ს, რაც შეუძლებელია). დაგვრჩა ისევ 12** სახის რიცხვები. ანუ ორი დარჩენილი ციფრიდან ერთი აუცილებლად უნდა იყოს 1-იანი და ერთი 0. სულ ორი ვარიანტია: 1210, რომელიც უკვე ვიცით და 1201, რომელიც არ არის "ავტობიოგრაფიული" რიცხვი. 

ახლა განვიხილოთ 2*** სახის რიცხვები. ეს რიცხვი უნდა შეიცავდეს ზუსტად 2 ცალ 0-ს. ანუ, უნდა იყოს შემდეგი სახის: 200*, 2*00, 20*0. პირველი და მეორე ვარიანტები არ გამოგვადგება, იმიტომ, რომ მათ ჩანაწერში მესამე ადგილას, რომელიც მიუთითებს რიცხვში 2-იანების რაოდენობას, წერია 0. დაგვრჩა მესამე ვარიანტი 20*0. ადვილი შესამჩნევია, რომ ამ პირობებს აკმაყოფილებს მხოლოდ 2020, რომელიც `ავტობიოგრაფიული~ რიცხვია. 

ამჯერად ჟურნალის მკითხველებიდან სწორი პასუხი ვერავინ გვაცნობა. 

მორიგი ამოცანა №243 

არსებობს თუ არა ისეთი ნატურალური რიცხვი, რომლის ყველა გამყოფის ნამრავლი დაბოლოვდეს ზუსტად 2021 ცალი ნულით? 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი "ზაზი მეტროში"; 

2) ჯ. ლონდონის მოთხრობების კრებული "როცა ღმერთები იცინიან"; 

3) ო. ჰენრის ნოველების კრებული "ზაფხულის შუადღის სიზმარი"; 

4) რეიმონ კენოს რომანი "ქალი არ უნდა გაანებივრო". 

გამარჯვებულის ვინაობა გამოქვეყნდება! დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. გისურვებთ წარმატებებს!