ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას.
რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია.
ჟურნალის წინა ნომერში გამოქვეყნებული ამოცანა #245
იპოვეთ შემდეგი ექვსუცნობიანი განტოლების ერთი არანულოვანი ნატურალური ამონახსნი მაინც:
35x + 36y + 37z = 38a + 39b + 40c
ამოცანის ამოხსნა
ამ განტოლების ერთ-ერთი ამონახსნია:
x = 40, y = 39, z = 38, a = 37, b = 36, c = 35
ამჯერად ჟურნალის მკითხველებიდან სწორი პასუხი პირველმა გვაცნობა და "ააფის" პრიზი დაიმსახურა ია ბერიძემ.
მორიგი ამოცანა #246
დაფაზე წერია რიცხვები 1-დან 30-ის ჩათვლით. ყოველ ოპერაციაზე დასაშვებია წაიშალოს დაფაზე დაწერილი რომელიმე a და b რიცხვები და მათ ნაცვლად დაიწეროს რიცხვი ab + a + b. რა რიცხვი დარჩება დაფაზე 29 ასეთი ოპერაციის შემდეგ?
რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ-ერთი წიგნი:
1) ფრანგი მწერლის, რეიმონ კენოს რომანი "ზაზი მეტროში";
2) ჯ. ლონდონის მოთხრობების კრებული "როცა ღმერთები იცინიან";
3) ო. ჰენრის ნოველების კრებული "ზაფხულის შუადღის სიზმარი";
4) რეიმონ კენოს რომანი "ქალი არ უნდა გაანებივრო".
გამარჯვებულის ვინაობა გამოქვეყნდება!
დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge.
გისურვებთ წარმატებებს!