ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა №258  

2x2x2 განზომილების კუბის შესაღებად საჭიროა 5 გრამი საღებავი. რამდენი გრამი საღებავია საჭირო 8x8x8 განზომილების კუბის შესაღებად? 

ამოცანის ამოხსნა  

შევნიშნოთ, რომ 8x8x8 განზომილების კუბის ერთი წახნაგის ფართობი, 16-ჯერ მეტია 2x2x2 განზომილების კუბის ერთი წახნაგის ფართობზე. ცხადია, ორივე სახის კუბის შეღებვისას უნდა შეიღებოს მისი ექვსივე წახნაგი. შესაბამისად, 8x8x8 განზომილების კუბის შესაღებად საჭიროა 16×5=80 გრამი საღებავი. 

ამჯერად ჟურნალის მკითხველებიდან სწორი პასუხი პირველმა გვაცნობა და "ააფის" პრიზი დაიმსახურა დავით აროშიძემ. 

მორიგი ამოცანა №259  

წიგნის გვერდების დასანომრად გამოყენებულია 1500 ცალი ციფრი. სულ რამდენი გვერდია ამ წიგნში? 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი "ზაზი მეტროში"; 

2) ჯ. ლონდონის მოთხრობების კრებული "როცა ღმერთები იცინიან"; 

3) ო. ჰენრის ნოველების კრებული "ზაფხულის შუადღის სიზმარი"; 

4) რეიმონ კენოს რომანი "ქალი არ უნდა გაანებივრო". 

გამარჯვებულის ვინაობა გამოქვეყნდება! 

დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. 

გისურვებთ წარმატებებს! 

ფრიდონ ალშიბაია