ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა №260

 

ქვეყანაში 15 მინისტრიდან თითოეულმა იცის მხოლოდ თავისი პაროლი. ექსტრემალური სიტუაციის დროს, მათ ერთმანეთს უნდა გააგებინონ პაროლები სპეციალური სატელეფონო კავშირის საშუალებით ისე, რომ ყველა მათგანმა იცოდეს ყველა პაროლი. სატელეფონო ხაზი ერთდროულად აკავშირებს მხოლოდ ორ აბონენტს. რა მინიმალური რაოდენობის სატელეფონო ზარია ამისთვის საჭირო? მინისტრს, რომელიც გაიგებს სხვა პაროლებს, ცხადია, უფლება აქვს ისინი გაანდოს სხვებსაც. 

ამოცანის ამოხსნა  

შევნიშნოთ, რომ 4 მინისტრის შემთხვევაში, ყველას ყველა პაროლი ეცოდინება 4 ზარით. მაგალითად, თუ დავნომრავთ 4-ივე მათგანს 1-დან 4-მდე, სასურველი შედეგი შემდეგი ზარებით მიიღწევა: 1-2, 3-4, 1-3, 2-4. თუ დავამატებთ ერთ მინისტრს, ზარების რაოდენობა 2-ით იზრდება: მე-5 დარეკავს 4-იდან რომელიმე მინისტრთან, რომელთა შორის 4 დარეკვაში (როგორც ზემოთ აღვწერეთ) ყველას ეცოდინება ყველას პაროლი (მათ შორის მე-5 მინისტრის პაროლიც) და შემდეგ რომელიმე მათგანი დაურეკავს მე-5 მინისტრს და ეტყვის ყველა პაროლს. ანალოგიური პრინციპით, ამ სქემაში, ყოველ მომდევნო ეტაპზე ერთი მინისტრის დამატებას დასჭირდება დამატებით 2 სატელეფონო ზარი. შესაბამისად, 15 მინისტრი დაკისრებულ ამოცანას შეასრულებს 4+11x2=26 სატელეფონო ზარით. 

ამჯერად ჟურნალის მკითხველებიდან სწორი პასუხი ვერავინ გვაცნობა. 

მორიგი ამოცანა #261  

99ხ99 კვადრატული ფორმის საკოორდინატო ბადის კვანძებში დარგულია 10000 ერთნაირი ხე (ანუ, 100 რიგში დარგულია თითოეულში 100 ხე თანაბარი დაშორებებით). რა მაქსიმალური ოდენობის ხის მოჭრა არის ამ სატყეო ნაკვეთში შესაძლებელი, იმ პირობით, რომ არცერთი ხის გადაჭრის შემდეგ დარჩენილ კუნძზე დადგომისას არ უნდა გამოჩნდეს სხვა კუნძი? 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი `ზაზი მეტროში~; 

2) ჯ. ლონდონის მოთხრობების კრებული `როცა ღმერთები იცინიან~; 

3) ო. ჰენრის ნოველების კრებული `ზაფხულის შუადღის სიზმარი~; 

4) რეიმონ კენოს რომანი `ქალი არ უნდა გაანებივრო~. 

გამარჯვებულის ვინაობა გამოქვეყნდება! 

დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. 

გისურვებთ წარმატებებს! 

ფრიდონ ალშიბაია