ამ რუბრიკით ქვეყნდება საინტერესო ამოცანები იმ მკითხველებისთვის, რომელთაც სურთ ლოგიკურ აზროვნებაში გავარჯიშება. ამოცანების ამოხსნა მოითხოვს ლოგიკისა და ელემენტარული მათემატიკის ცოდნას. 

რუბრიკას უძღვება შპს "ააფ მენეჯმენტის" გენერალური დირექტორი ფრიდონ ალშიბაია. 

ჟურნალის წინა ნომერში გამოქვეყნებული ამოცანა №267

მოძებნეთ 10 ისეთი ნატურალური რიცხვი, რომელთა ჯამი იყოფა თითოეულ მათგანზე. 

ამოცანის ამოხსნა  

ავიღოთ პირველი ორი რიცხვი 1 და 2, მესამე რიცხვი ავიღოთ წინა ორის ჯამი, 1+2=3. მეოთხე იყოს ყველა წინა რიცხვის ჯამი _ 2×(1+2)=6 და ა.შ. ყოველი რიცხვი, მეოთხედან დაწყებული, იქნება წინას გაორმაგებული. მე 10 რიცხვი იქნება _ 27×3, ხოლო 1-იდან 10-მდე ყველა რიცხვის ჯამი იქნება 28×3, რომელიც ცხადია გაიყოფა 10-ივე მათგანზე. შესაბამისად, ეს რიცხვებია: 1, 2, 3, 6, 12, 24, 48, 96, 192, 384 (სადაც, ყოველი რიცხვი, მე-3-დან დაწყებული, წარმოადგენს წინა რიცხვების ჯამს). 

ამჯერად ჟურნალის მკითხველებიდან სწორი პასუხი ვერავინ გვაცნობა. 

მორიგი ამოცანა №268  

"ჭადრაკის ტურნირზე ერთ-ერთი თამაშის დროს მე დამრჩა 3-ჯერ ნაკლები რაოდენობის ფიგურა, ვიდრე მეტოქეს და 6-ჯერ ნაკლები, ვიდრე თავისუფალი უჯრების რაოდენობა საჭადრაკო დაფაზე, თუმცა მაინც შევძელი პარტიის მოგება", - უთხრა ხვიჩამ გოჩას. "მე კი ერთ-ერთი თამაშის დროს ფიგურები დამრჩა 5-ჯერ ნაკლები რაოდენობის, ვიდრე მეტოქეს და 10-ჯერ ნაკლები, ვიდრე თავისუფალი უჯრების რაოდენობა საჭადრაკო დაფაზე, თუმცა მაინც შევძელი პარტიის მოგება", - უპასუხა გოჩამ. რომელი მათგანი ამბობს სიმართლეს? პასუხი დაასაბუთეთ. 

რედაქციის გადაწყვეტილებით, პირველ მკითხველს, ვინც სწორად უპასუხებს ამ რუბრიკით გამოქვეყნებულ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ ერთი წიგნი: 

1) ფრანგი მწერლის, რეიმონ კენოს რომანი "ზაზი მეტროში"; 

2) ჯ. ლონდონის მოთხრობების კრებული "როცა ღმერთები იცინიან"; 

3) ო. ჰენრის ნოველების კრებული "ზაფხულის შუადღის სიზმარი"; 

4) რეიმონ კენოს რომანი "ქალი არ უნდა გაანებივრო". 

გამარჯვებულის ვინაობა გამოქვეყნდება! დაგვირეკეთ ტელეფონზე: (595) 59 02 75 ან (579) 30 27 27 (მობ.) ან გამოგვიგზავნეთ პასუხი ელექტრონული ფოსტით - palshibaia@tsodnisa.ge. 

გისურვებთ წარმატებებს! 

ფრიდონ ალშიბაია